ටෝක්ස් ඇන්ඩ් ජෝක්ස් – අළුත් චිත්‍රකතා සඟරාව

ටෝක්ස් ඇන්ඩ් ජෝක්ස් – අළුත් චිත්‍රකතා සඟරාව – පළමු කලාපය

පත්තර කඩේ අළුත් අළුත් චිත්‍රකතා සඟරාවක් දකිද්දී පුදුම සන්තෝෂයක් දැනුණේ. ටෝක්ස් ඇන්ඩ් ජෝක්ස් සඟරාව බලන්න වගේම ඒක පවත්වාගෙන යන අය දිරි ගන්වන්නත් එක්කමයි කොපියක් ගත්තේ. ඒත් පිටු පෙරළලා බලනකොට නම් බලා පොරොත්තු කඩවුණා. මුලින්ම සඟරාවේ නමම පාඨකයන් සඟරාවෙන් එළවන නමක්. මේකට මීට වඩා වැදගත් නමක් දාන්න තිබුණා. ටෝක්ස් ඇන්ඩ් ජෝක්ස් කියපු ගමන්ම මේක දෙවන පන්තියට වැටෙනවා.

අනිත් එක තමයි මෙයාලා මතක තියා ගන්න ඕනේ ප්‍රධාන දෙයක් තමයි චිත්‍රකතා වැඩියෙන්ම බලන්නේ ඒවගෙන් 70-80 වල සන්තෝෂ වුණ, දැන් අවුරුදු 30-40 ට එහා වයස් කාණ්ඩය කියන එක. අළුත් තරුණ පරපුරට චිත්‍රකතා වලට වඩා හිත ඇදිලා යන දේවල් කොච්චරවත් තියෙනවා. ඉතින් ඉහත කී කණ්ඩායම සන්තෝෂ කරන්න නම් එයාලා ආශා කරපු විදිහේ කතා ටිකක් අඳින්න ඕනේ. ඉතිං ඊට පස්සේ, යුනිකෝ, ටෝගා, ගජමෑන් වගේ ඒවා ඒ කාලේ නැගලා ගියා. ඊට ටිකක් හරි ළඟින් යන කතා ටිකක් මෙයාලාට අඳින්න තිබුණා. ඒත් මෙයාල අඳින්නේ කිසිම කතා රසයක්, කුතුහලයක් නැති කතා. හරියටම අද කාලේ ටෙලි නාට්‍ය වගේ. චිත්‍රකතා වල ටෙලි නාට්‍ය වලට වඩා කුතුහලයක් තිබ්බා. හැම කතාවකම අන්තිම කොටුවේ තිබ්බේ ඊළඟ සතියේ පත්තරේ ගන්නම හිතෙන විදිහේ හිතේ කුතුහලය උපරිමයට අවුස්සන දර්ශනයක්. ඒත් මේ චිත්‍රකතා සඟරාව දැක්කට පස්සේ මට ආයේ නම් ඒක ගන්න හිතුණේ නැහැ.

කාලයට අනුරූපව චිත්‍රකතා කලාව වෙනස් වෙන්න ඕනේ තමයි. ඒත් මූලිකම කරුණු අමතක කොට යන ගමනක් සාර්ථක වේ යයි සිතන්න බෑ. මම හිතන්නේ නැහැ මේ චිත්‍රකතා සඟරාව වෙනස් කර නොගත්තොත් වැඩි කල් පවතියි කියලා. මේක නතර වෙනවනම් අපරාධයක් තමයි. ඒත් මොනවා කරන්නද කරන්න දේවල් තියෙද්දී බොළඳ වැඩ කරනකොට?

සඟරාවක මිල රුපියල් 100යි. ඒකට නම් කරන්න දෙයක් නැහැ. වර්ණ පිටුත් මුද්‍රණය කරන නිසා ඊට අඩුවෙන් දෙන්න අමාරු ඇති.

එකම කතාව පිටු 3-4කට දුවනවා. ඒකත් අළුත් දෙයක් කියලා හිතමුකෝ. ප්‍රශ්නේ තියෙන්නේ චිත්‍ර ඇඳලා තියෙන ආකාරය එච්චර සිත් ගන්නා සුළු නොවීම. ඉස්සර චිත්‍රයක් අඳිද්දී සිත්තරා මොන තරම් පරිස්සමෙන්ද චිත්‍රය ඇන්දේ? දැන් එහෙම දෙයක් දකින්න නෑ. ඉක්මනට ඉවර කරගන්න අඳිනවා වගෙයි. සමහර විට ගෙවීම් අඩු නිසා මෙහෙම කරනවාත් වෙන්න පුළුවන්.

කොහොමටත් චිත්‍රකතාවල අතීත ශ්‍රී විභූතිය ආපසු ගන්න බැරිවේවි. ඉඳලා හිටලා චිත්‍රකතා පත්තරයක් පළවෙලා කලාප කිහිපයකට පස්සේ වැහිලා යනවා. මේකටත් ඒකම වෙන්න තියෙන ඉඩ කඩ වැඩියි. ඒත් එහෙම නොවෙනවානම් තමයි හොඳ.